Back

"ምድረ ቀደምት" የ“Land of Origins” የአማርኛ አቻ ሆኖ ተመረጠ፤

መጋቢት 13፣ 2009 ዓ.ም.

ክቡር ጠቅላይ ሚኒስትር ኃይለማሪያም ደሳለኝ የሀገራችን ልዩ መለያ የሆነው ብራንድ "Land of Origins" የአማርኛ አቻ ዛሬ ይፋ አደረጉ፡፡

የ"Land of Origins" አማርኛ አቻው ይፋ የሆነው ዛሬ በሻራተን አዲስ በተካሄደው አራተኛ የኢትዮጵያ ቱሪዝም ትራንፎርሜሽን ምክር ቤት መደበኛ ጉባኤ ላይ ነው፡፡

በጉባኤው የኢትዮጵያ ቱሪዝም ድረጅት የሥራ እንቅስቃሴ ሪፖርት ቀርቦ ውይይት ተደርጎበታል፡፡

ከተሳታፊዎች ጥያቄዎችና ለቀጣይ ሥራ ግብዓት የሚሆኑ አስተተያየቶች ቀርበው በጠቅላይ ሚኒስትሩና በሚመለከታቸው የሥራ ኃላፊዎች ማብራሪያና መልስ ተሰጥቶባቸዋል፡፡

ክቡር ጠቅላይ ሚኒስትሩ ለተነሱ ጥያቄዎች ማብራሪያና ምላሽ በሰጠበት ወቀት እንዳሉት አገራችን ኢትዮጵያ በዘርፉ እምቅ ሀብት ያላት ቢሆንም ተጠቃሚ መሆን አለመቻሏን ከግምት ውስጥ በማስገባት የቱሪዝም ትራንፎርሜሽን ምክር ቤት በማቋቋም አሉ የተባሉ ማነቆዎችን የመፈተሽና የመፍትሔ አቅጣጫ የማስቀመጥ ሥራዎች ሲሰሩ ቆይተዋል፡፡

ለአገራችን በጎ ገጽታ ግንባታ ሥራችን ከፍተኛ ሚና ከመጫወትና ኢኮኖሚዋን ከመደገፍ አኳያ ከፍተኛ አስተዋጽኦ ሊያበረክት የሚችለውን ይህን ዘርፍ የማጠናከር ሥራ ለአንድ ተቋም አሊያም ለተወሰኑ አካላት የሚተው ባለመሆኑ ሁሉም አካላት ለዘርፉ ውጤታማነት አስተዋጽኦ ማድረግ እንዲሚገባ ነው ጠቅላይ ሚኒስትሩ የተናገሩት፡፡

በተለይ የባህልም ሆነ የቱሪዝም ባለቤት ሕዝብ በመሆኑ ሕዝቡ በባለቤትነት እንዲጠብቅና እንዲደግፍ ማድረግና በዘርፉ መልማት ተጠቃሚው ራሱ ሕዝቡ መሆኑ ከግንዛቤ ውስጥ ገብቶ የክልልና የፌዴራል የመንግሥት የሥራ ኃላፊዎች ከሕዝቡ ጋር በመቀናጀት ቀጣይነት ያለው ሥራት መሥራት እንደሚገባም ተገልጿል፡፡

በቱሪዝም ዘርፍ ከፍተኛ አስተዋጽኦ ያበረከቱት አቶ ሀብቴ ስላሴ ታፈሰ ከጠቅላይ ሚኒስትር ኃይለማሪያም ደሳለኝ እጅ የእውቅና ሽልማት ተቀብለዋል፡፡

ምንጭ፣ የኢ.ፌ.ዲ.ሪ. ጠ.ሚ. ጽ/ቤት