Back

የአለም ባንክ ለአፍሪካ የ57 ቢሊዮን ዶላር ድጋፍ ይፋ አደረገ ፤

መጋቢት 12፣2009 ዓ.ም.

የአለም ባንክ ከሰሃራ በታች ላሉ የአፍሪካ አገራት ለሚቀጥሉት ሶስት ዓመታት ለሚያካሂዱት የልማት ስራ የሚውል የ57 ቢሊዮን ዶላር ድጋፍ ይፋ አደረገ።

ባንኩ ትላንት መጋቢት 11፣2009 ዓ.ም. ይፋ ካደረገው የአጠቃላይ የድጋፍ ማዕቀፉ 45 ቢሊዮን ዶላር ያህሉ ከአለም አቀፉ የልማት ማህበርና የአለም ባንክ ፈንድ ለአለም ድሃ አገራት ከሚሰጠው እርዳታና ከወለድ ነፃ ብድር የሚገኝ መሆኑን የአለም ባንክ ፐሬዝዳንት ጂም ዮንግ ኪም ተናግረዋል።

ለግሉ ዘርፍ የኢንቨስትመንት ፍሰት እንዲውል ደግሞ 8 ቢሊዮን ዶላር ተመድቧል። ከአህጉሪቱ አገራት ወደ መካከለኛ የምጣኔ ሀብት እድገት ውስጥ ለገቡ አገራት ባንኩ 4 ቢሊዮን ዶላር እንደሚሰጥ ይፋ አድርጓል።

የአለም ባንክ ፕሬዝዳንት እንደሚሉት ባንኩ አሁን ያደረገው ድጋፍ ውጤታማ እንዲሆን እና ተጨባጭ ለውጥ እንዲመጣ   በአገራቱ በትምህርት፣ ጤና፣ ንፁህ መጠጥ ውሃና ሳኒቴሽን፣ በግብርና፣ በመሰረተ ልማት፣ በተቋማዊ ለውጥና በሌሎች ዘርፎች ከሚሰሩ አጋር አካላት ጋር በጋራ እንደሚሰሩ ተናግረዋል።

የቡድን 20 አባል አገራት ባለፈው አርብና ቅዳሜ ጉባኤያቸውን በጀርመን ሲያካሂዱ ከአፍሪካ ጋር በቅርበት በመስራት ለእድገቷ አስፈላጊውን ድጋፍ እንደሚደረጉ አስታወቀው ነበር፡፡