Back

ናይጀሪያ ብሄራዊ የአየር መንገዷን መለሶ ለማቋቋም የኢትዮጵያ አየር መንገድን ድጋፍ ጠየቀች፣

መጋቢት 13፣ 2009 ዓ.ም.

የኢትዮጵያ አየር መንገድ ዋና ስራ አስፈጻሚ አቶ ተወልደ ገብረ-ማሪያም አቬሽን ኢንተርናሽናል ኒውስ ከተባለ የዜና ምንጭ ጋር ባደረጉት ቃለ-ምልልስ የናይጀሪያ መንግስት እ.ኤ.አ በ2012 አገልግሎቱን ያቆመውን የናይጀሪያ ብሄራዊ አየር መንገድ መልሶ ለማቋቋም የኢትዮጵያ አየር መንገድን ድጋፍ ጠይቋል ብለዋል።

የናይጀሪያ መንግስት ድጋፉን የጠየቀው ዋና ስራ አስፈጻሚው በቅርቡ በናይጀሪያ ያደረጉትን ጉብኝት ተከትሎ ነው። በሚቀጥሉት አመታት ኢኩይቲ ኢንቨስትመንትን ጨምሮ በሌሎች ዘርፎች ለመተባበር የሚያስችል ውይይት እንደሚደረግ ዋና ስራ አስፈጻሚው ጠቅሰው፣ ለጊዜው ግን በማኔጀመንት ዘርፍ ድጋፉን ለማድረግ የሚያስችል ስምምነት ዙሪያ ላይ ውይይት መደረጉን ገልጸዋል።

የናጀሪያው አየር መንገድ እ.ኤ.አ. በ2012 በፋይናንስ ችግር ምክንያት አገልግሎቱን ከአቋረጠ በኋላ የአፍሪካ ግዙፍ የምጣኔ ኃብት ባለቤት የሆነችው ናይጀሪያ ብሄራዊ አየር መንገድ አልባ ሆና ቆይታለች።